امریکی سینیٹ، ایران پر حملوں کیلئے کانگریس سے منظوری کی قرارداد مسترد

امریکی سینیٹ نے صدر ڈونلڈ ٹرمپ کو ایران پر حملے کے لیے کانگریس کی پیشگی منظوری کا پابند بنانے سے متعلق اہم قرارداد مسترد کر دی ہے۔

خبر رساں ادارے کے مطابق، 100 رکنی ایوان میں ہونے والی پولنگ میں قرارداد کے حق میں 47 جبکہ مخالفت میں 52 ووٹ آئے۔ سینیٹ میں ری پبلکن پارٹی کی اکثریت ہونے کی وجہ سے صدر ٹرمپ اپنی پوزیشن مستحکم رکھنے میں کامیاب رہے۔

یاد رہے کہ اس قرارداد کو ڈیموکریٹس اور چند ری پبلکن سینیٹرز نے مشترکہ طور پر پیش کیا تھا، جس میں مطالبہ کیا گیا تھا کہ صدر ایران پر کسی بھی ممکنہ فضائی حملے یا فوجی کارروائی سے قبل امریکی کانگریس سے باقاعدہ اجازت نامہ حاصل کریں۔ تاہم، ایوان کی اکثریت نے اس پابندی کو قومی سلامتی کے منافی قرار دیتے ہوئے مسترد کر دیا۔

سیاسی تجزیہ کاروں کا کہنا ہے کہ اس فیصلے سے صدر ٹرمپ کو ایران کے خلاف سخت گیر پالیسی جاری رکھنے کے لیے مزید سیاسی تقویت ملے گی۔