امریکی صدر نے وینزویلا پر متوقع دوسرا فوجی حملہ منسوخ کردیا

امریکی صدر ڈونلڈ ٹرمپ نے وینزویلا پر متوقع دوسری فوجی حملے کی لہر منسوخ کرنے کا اعلان کر دیا ہے۔ صدر ٹرمپ کے مطابق وینزویلا کی جانب سے تعاون سامنے آنے کے بعد اس فیصلے پر نظرثانی کی گئی اور دونوں ممالک کے درمیان معاملات اب بہتر انداز میں آگے بڑھ رہے ہیں۔

صدر ٹرمپ نے کہا کہ وینزویلا میں تیل کے شعبے میں بڑی امریکی کمپنیوں کی جانب سے تقریباً 100 ارب ڈالر کی سرمایہ کاری کا منصوبہ زیر غور ہے، جس کے حوالے سے وہ آج وائٹ ہاؤس میں متعلقہ کمپنیوں کے نمائندوں سے ملاقات کریں گے۔

تاہم امریکی صدر نے واضح کیا کہ وینزویلا میں موجود تمام آئل ٹینکرز حفاظتی اور سیکیورٹی وجوہات کی بنیاد پر اپنی موجودہ جگہوں پر ہی رہیں گے، اور اس معاملے پر کوئی نرمی نہیں برتی جائے گی۔

واضح رہے کہ اس سے قبل نیویارک ٹائمز کو دیے گئے ایک انٹرویو میں صدر ڈونلڈ ٹرمپ نے کہا تھا کہ ان کے فیصلے بین الاقوامی قوانین کے پابند نہیں ہیں اور امریکا کی قومی سلامتی اور مفادات کے تحفظ کے لیے وہ کسی بھی ملک میں کارروائی کرنے کا اختیار رکھتے ہیں۔ ان کے بقول، ان کی ’’اپنی اخلاقیات اور ذاتی فیصلہ‘‘ ہی وہ واحد حد ہے جو انہیں روکتی ہے۔