ایران پر پیشگی کارروائی درست فیصلہ تھا، ہم مضبوط پوزیشن میں ہیں: ٹرمپ

امریکی صدر ڈونلڈ ٹرمپ نے کہا ہے کہ ایران کے خلاف پیشگی کارروائی امریکا کے مفاد میں تھی اور اس وقت امریکا صورتحال پر مکمل کنٹرول میں ہے۔

ایک اجلاس سے خطاب میں انہوں نے کہا کہ اگر ایران پر بروقت حملہ نہ کیا جاتا تو ایران جلد ایٹمی ہتھیار حاصل کر لیتا اور امریکا کو نشانہ بنا سکتا تھا۔ ان کا کہنا تھا کہ ایرانی میزائل نظام اور لانچروں کو نشانہ بنایا جا رہا ہے۔

صدر ٹرمپ نے دعویٰ کیا کہ ایران خطے میں اپنے پڑوسی ممالک اور اتحادیوں کے لیے خطرہ بنا ہوا تھا، تاہم امریکی اقدامات کے بعد صورتحال تبدیل ہو رہی ہے۔ انہوں نے کہا کہ ایران میں قیادت کے خواہشمند افراد کو ختم کیا جا رہا ہے۔

انہوں نے سابق صدر باراک اوباما کی ایران کے ساتھ جوہری مفاہمت کو ناقص قرار دیتے ہوئے کہا کہ وہ معاہدہ امریکا کے لیے نقصان دہ تھا۔

صدر ٹرمپ نے بتایا کہ وینزویلا سے تیل کی درآمد کا سلسلہ دوبارہ شروع ہو گیا ہے جس سے توانائی کی ضروریات پوری کرنے میں مدد ملے گی۔