امریکی فوج کو ایران پر ممکنہ حملوں کے لیے تیار رہنے کا حکم

امریکی میڈیا کی رپورٹس کے مطابق پینٹاگون نے سینٹرل کمانڈ کو ایران پر ممکنہ حملوں کے لیے اپنی تیاری مکمل کرنے کی سخت ہدایت جاری کر دی ہے، جبکہ صدر ڈونلڈ ٹرمپ ان حملوں کے درست وقت پر غور کر رہے ہیں۔ ممکنہ حملوں کے اہداف میں ایران کا توانائی کا شعبہ، بنیادی ڈھانچہ اور حساس جوہری تنصیبات شامل ہو سکتی ہیں۔ ادھر وائٹ ہاؤس نے دعویٰ کیا ہے کہ آبنائے ہرمز پر کنٹرول کے باعث امریکا کو انتہائی مضبوط پوزیشن حاصل ہے۔ امریکی سینٹرل کمانڈ نے ایرانی فوج کا آبنائے ہرمز کی بندش سے متعلق دعویٰ مسترد کرتے ہوئے واضح کیا ہے کہ آبنائے مکمل طور پر کھلا ہے، تمام بحری بارودی سرنگیں ہٹا دی گئی ہیں اور وہاں سے روزانہ کروڑوں بیرل تیل کی نقل و حرکت بغیر کسی تعطل کے جاری ہے۔