ایران کے حملوں کے بعد امریکی فوج نے کویت کا اہم اڈہ خالی کر دیا

امریکی نشریاتی ادارے ‘سی بی ایس نیوز’ (CBS News) نے ایک تہلکہ خیز رپورٹ میں انکشاف کیا ہے کہ ایران کی جانب سے کیے جانے والے شدید میزائل اور ڈرون حملوں کے بعد امریکی فوج کو کویت میں واقع اپنا اہم اور بڑا ملٹری بیس ‘کیمپ بیورنگ’ (Camp Buehring) عارضی طور پر خالی کرنا پڑا ہے۔ رپورٹ کے ساتھ جاری ہونے والی ویڈیو میں ایرانی ڈرونز اور ایف-5 جنگی طیاروں کے حملوں کے باعث بیس کو پہنچنے والے شدید نقصان اور دھماکوں کے مناظر دیکھے جا سکتے ہیں۔

سی بی ایس نیوز کے مطابق، جنگ کے ابتدائی مرحلے میں حملوں کے دوران بیس پر موجود دفاعی نظام اور پیٹریاٹ انٹرسیپٹر میزائلوں کا ذخیرہ خطرناک حد تک کم ہو گیا تھا، جس کے باعث 100 کے قریب امریکی فوجیوں کے پاس بیس کو چھوڑنے کے سوا کوئی چارہ نہیں بچا تھا۔ فوجیوں نے بیس خالی کرنے کے بعد کویتی صحرا میں عارضی اور غیر رسمی ملٹری آؤٹ پوسٹس قائم کیں۔ رپورٹس میں تصدیق کی گئی ہے کہ ان حملوں اور تباہی کے باوجود کیمپ بیورنگ میں کوئی امریکی فوجی ہلاک نہیں ہوا، تاہم متعدد افراد زخمی ہوئے جنہیں فوری طبی امداد فراہم کی گئی۔