اقوام متحدہ کی سلامتی کونسل نے ایران کے پڑوسی ممالک پر حملوں کیخلاف قرارداد منظورکرلی

اقوامِ متحدہ کی سلامتی کونسل میں ایران کی جانب سے پڑوسی ممالک پر کیے گئے حملوں کے خلاف پیش کی گئی قرارداد کثرتِ رائے سے منظور کر لی گئی۔

خلیجی ممالک کی تیار کردہ اس قرارداد کے حق میں 13 ارکان نے ووٹ دیا جبکہ چین اور روس ووٹنگ کے دوران شریک نہیں ہوئے۔

پاکستان نے بھی قرارداد کی حمایت کرتے ہوئے اس کے حق میں ووٹ دیا جبکہ اسے شریک پیش کنندگان میں بھی شامل کیا گیا۔

بحرین کے مندوب کے مطابق اس قرارداد کو 135 ممالک کی مشترکہ حمایت حاصل رہی، جو اقوامِ متحدہ کی تاریخ میں ایک نمایاں سفارتی مثال ہے۔

سلامتی کونسل میں پاکستان کے مستقل مندوب عاصم افتخار احمد نے خطاب کرتے ہوئے کہا کہ ایران پر ہونے والے امریکی اور اسرائیلی حملوں کی بھی مذمت کی گئی ہے اور خطے میں جاری کشیدگی عالمی امن کے لیے خطرہ بن رہی ہے۔

انہوں نے کہا کہ متحدہ عرب امارات پر ایرانی حملوں میں دو پاکستانی شہری جاں بحق ہوئے جبکہ خلیجی ممالک میں مقیم لاکھوں پاکستانیوں کو بھی خدشات لاحق ہیں۔

پاکستانی مندوب کا کہنا تھا کہ پاکستان ایران کی خودمختاری کی حمایت کرتا ہے اور خطے میں پائیدار امن کے لیے مذاکرات اور سفارت کاری کا راستہ اختیار کرنا ضروری ہے۔

اجلاس میں اماراتی مندوب محمد ابو شہاب نے کہا کہ ایرانی حملے دہشت پھیلانے کی کوشش ہیں اور عالمی برادری کو اس معاملے پر مؤثر ردعمل دینا چاہیے۔