ایران سمیت مشرق وسطیٰ میں انسانی بحران جنم لے رہا ہے: اقوام متحدہ

اقوامِ متحدہ نے ایران اور امریکہ و اسرائیل کے درمیان جاری جنگ پر گہری تشویش کا اظہار کرتے ہوئے اسے ایک عظیم انسانی المیے کا پیش خیمہ قرار دیا ہے۔ اقوامِ متحدہ کے نمائندے ٹام فلیچر نے میڈیا کو بریفنگ دیتے ہوئے انکشاف کیا کہ جنگ کے دوران بین الاقوامی قوانین کی دھجیاں اڑاتے ہوئے گھروں، اسپتالوں اور اسکولوں کو نشانہ بنایا جا رہا ہے۔ ان کا کہنا تھا کہ بمباری کی شدت کے باعث اقوامِ متحدہ کی امدادی کارروائیوں اور ردِعمل دینے کی صلاحیت محدود ہو کر رہ گئی ہے۔

ٹام فلیچر نے مزید خبردار کیا کہ عالمی تجارت کے لیے انتہائی اہم راستہ “آبنائے ہرمز” اگر طویل عرصے تک رکاوٹوں کا شکار رہا، تو عالمی سطح پر خوراک کا بحران پیدا ہو جائے گا۔ انہوں نے کہا کہ سپلائی چین متاثر ہونے کی صورت میں کھانے پینے کی اشیاء کی قیمتیں آسمان سے باتیں کریں گی، جس کا سب سے زیادہ اثر غریب ممالک اور جنگ زدہ علاقوں کے عوام پر پڑے گا۔