روس کو یوکرین میں جوہری ہتھیار استعمال کرنے سے چین نے روکا؛ صدر زیلنسکی

یوکرین کے صدر وولودیمیر زیلنسکی نے دعویٰ کیا ہے کہ چین نے روس کو یوکرین جنگ میں جوہری ہتھیاروں کے استعمال یا اس کی دھمکی کے خلاف سخت اور واضح پیغام دیا ہے کہ ایسا کوئی بھی اقدام ناقابلِ قبول ہو گا۔ دوسری جانب یوکرینی فوج نے بحیرہ آزوف اور بحیرہ اسود میں روس کے بحری بیڑے کے خلاف اب تک کی سب سے بڑی کارروائی کا دعویٰ کرتے ہوئے کہا ہے کہ انہوں نے ایک ہی رات میں روس کے 18 بحری جہازوں کو نشانہ بنایا ہے، جن میں 13 آئل ٹینکر اور 3 کارگو جہاز شامل ہیں۔ یوکرینی جنرل اسٹاف کے مطابق، گزشتہ 4 دنوں کے دوران روس کے 36 سے زائد بحری جہازوں اور روس کے اندرونی علاقوں (کراسنوڈار اور لینن گراڈ) میں واقع اہم آئل ریفائنریز اور ٹرمینلز کو ڈرون حملوں سے نشانہ بنایا گیا ہے، جس سے روسی افواج کی لاجسٹکس اور ایندھن کی ترسیل بری طرح متاثر ہوئی ہے۔ ادھر جمہوریہ چیک کے صدر پیٹر پاویل نے خبردار کیا ہے کہ روس ستمبر میں ہونے والے پارلیمانی انتخابات کے بعد نئی فوجی بھرتیوں کا اعلان کر سکتا ہے جس سے جنگ میں مزید شدت آنے کا خدشہ ہے۔ اگرچہ روس نے یوکرین کے ان فوجی نقصانات کے دعوؤں کی آزادانہ تصدیق نہیں کی، تاہم رپورٹس کے مطابق روس کے مختلف علاقوں میں ایندھن کی قلت اور قیمتوں میں اضافہ دیکھا جا رہا ہے۔