برطانیہ کی امریکا کے زیر استعمال ایئربیس پر دہشتگردی کے شواہد نہ ملنے کی تصدیق

برطانیہ کی انسدادِ دہشت گردی پولیس نے واضح کیا ہے کہ امریکی فضائیہ کے زیرِ استعمال برطانوی ائیر بیس ‘آر اے ایف فیئر فورڈ’ (RAF Fairford) کو نشانہ بنانے کے مبینہ منصوبے کی تحقیقات کے دوران انہیں کوئی دیسی ساختہ بم (IED) یا دھماکا خیز مواد برآمد نہیں ہوا ہے۔ پولیس حکام کے مطابق، جائے وقوعہ پر روکی گئی مشکوک گاڑیوں کی تفصیلی تلاشی کے دوران صرف کچھ مقدار میں پیٹرول ملا ہے۔ اس کے باوجود معاملے کی تہہ تک پہنچنے اور تمام تر کڑیوں کو ملانے کے لیے لندن میں مختلف مقامات پر تلاشی کی کارروائیاں کی گئی ہیں۔

پولیس کے مطابق، ائیر بیس کے گرد و نواح میں تفتیشی سرگرمیوں کا دائرہ اب تدریجی طور پر محدود کیا جا رہا ہے اور توقع ہے کہ آج کرائم سین کو مکمل طور پر ختم کر دیا جائے گا۔ واضح رہے کہ اس مبینہ منصوبے کے سلسلے میں اتوار کے روز 5 افراد کو حراست میں لیا گیا تھا، جنہیں قانونی چارہ جوئی کے بعد ضمانت پر رہا کر دیا گیا ہے، تاہم ان کے خلاف انسدادِ دہشت گردی کی تحقیقات بدستور جاری رہیں گی۔