یو اے ای کی میعاد ختم رہائشی ویزا رکھنے والے غیر ملکیوں کو 31 مارچ تک ملک واپسی کی مہلت

متحدہ عرب امارات میں حکام نے ایسے غیر ملکی رہائشیوں کو، جن کے رہائشی ویزا کی میعاد ملک سے باہر ختم ہو چکی ہے، 31 مارچ 2026 تک واپسی کے لیے خصوصی مہلت فراہم کر دی ہے۔

اماراتی میڈیا کے مطابق اس اقدام کا مقصد متاثرہ افراد کو قانونی حیثیت بحال کرنے اور سفری معاملات کو منظم انداز میں مکمل کرنے کا موقع دینا ہے۔

واپسی کے دوران کچھ مالی جرمانوں اور انتظامی پابندیوں میں نرمی ممکن ہے، تاہم یہ ہر کیس کی نوعیت اور قواعد کے مطابق ہوگی۔ حکام نے کہا کہ امیگریشن کے عمل کو مکمل کرنے اور ضروری دستاویزات فراہم کرنے کے بعد ہی قانونی حیثیت بحال ہوگی۔

متعلقہ حکام نے شہریوں اور غیر ملکی رہائشیوں کو مشورہ دیا ہے کہ مقررہ مدت کے اندر اپنی قانونی حیثیت واضح کریں تاکہ آئندہ مشکلات سے بچا جا سکے۔