صدر ٹرمپ کی جانب سے روسی تیل پر 500فیصد ٹیرف ، بھارتی اسٹاک مارکیٹ شدید دباؤ کا شکار

امریکی صدر ڈونلڈ ٹرمپ نے روس سے تیل خریدنے والے ممالک پر 500 فیصد تک ٹیرف عائد کرنے کے بل کی حمایت کر دی ہے، جس کے بعد عالمی منڈیوں میں بے چینی بڑھ گئی جبکہ بھارتی اسٹاک مارکیٹ شدید دباؤ کا شکار ہو گئی۔

بھاری ٹیرف سے متعلق خبروں کے بعد بھارت کی اسٹاک مارکیٹ مسلسل چوتھے روز بھی مندی کی لپیٹ میں رہی، جہاں سرمایہ کاروں کو چار دنوں میں مجموعی طور پر 9 لاکھ کروڑ بھارتی روپے کا نقصان اٹھانا پڑا۔

یہ ٹیرف بل امریکی سینیٹر لنزے گراہم نے پیش کیا ہے، جسے صدر ٹرمپ کی مکمل حمایت حاصل ہو گئی ہے، جبکہ بل کی منظوری اگلے ہفتے متوقع ہے۔ بل منظور ہونے کی صورت میں صدر ٹرمپ روس سے تیل خریدنے والے ہر ملک پر 500 فیصد تک ٹیرف عائد کرنے کے مجاز ہوں گے۔

بھارت پہلے ہی امریکی 50 فیصد ٹیرف کے باعث معاشی دباؤ میں ہے، جبکہ نئے بل سے چین اور برازیل جیسے بڑے ممالک بھی متاثر ہونے کا خدشہ ہے۔ ماہرین کے مطابق اس اقدام سے عالمی توانائی منڈی اور ابھرتی معیشتوں پر مزید دباؤ پڑ سکتا ہے۔