جنگ کے بعد ایران کا نقشہ شاید ویسا نہ رہے: امریکی صدر ٹرمپ

امریکی صدر ڈونلڈ ٹرمپ نے کہا ہے کہ جنگ کے بعد ایران کا نقشہ شاید ویسا نہیں نظر آئے گا جیسا آج ہے۔ ایئرفورس ون میں میڈیا سے گفتگو کرتے ہوئے صدر ٹرمپ نے کہا کہ امریکا ایران کے ساتھ کسی سمجھوتے یا سیٹلمنٹ کی تلاش میں نہیں ہے اور ہم ایران میں ایسا صدر چاہتے ہیں جو ملک کو جنگ کی طرف نہ لے جائے۔

ایک سوال کے جواب میں صدر ٹرمپ نے کہا کہ وہ نہیں چاہتے کہ کرد فورسز ایران میں داخل ہوں۔ برطانوی وزیراعظم کی ایران پالیسی سے متعلق سوال پر صدر ٹرمپ نے کہا کہ برطانیہ مشرق وسطیٰ میں دو طیارہ بردار جہاز بھیجنے پر غور کر رہا ہے، تاہم اب امریکا کو برطانیہ کی ضرورت نہیں، اور وہ یاد رکھیں گے کہ ہمیں ایسے لوگ نہیں چاہیے جو جنگ کے بعد شامل ہوں۔

صدر ٹرمپ نے مزید کہا کہ روس کی جانب سے ایران کی مدد کے کوئی شواہد نہیں ملے، اور ایران کے ایلیمینٹری اسکول پر حملے کا الزام ایران پر عائد کیا، تاہم اس کا ثبوت نہیں دیا۔ صدر نے دعویٰ کیا کہ تیل کی قیمتیں بہت تیزی سے نیچے آئیں گی۔

ادھر کویت میں ڈرون حملے میں ہلاک چھ امریکی فوجیوں کی میتیں ڈیلاویئر پہنچا دی گئیں، جس میں امریکی صدر اور خاتون اول نے شرکت کی۔ تجزیہ کاروں کا کہنا ہے کہ صدر ٹرمپ کا یہ موقف کہ جنگ کے بعد ایران کا نقشہ بدل سکتا ہے، خطے کے لیے تشویشناک ہے۔