ایران سے جنگ جیت گئے  مگر ابھی نہیں نکلیں گے، امریکی صدر کا دعویٰ

امریکی صدر ڈونلڈ ٹرمپ نے دعویٰ کیا ہے کہ امریکا ایران کے خلاف جنگ جیت چکا ہے تاہم امریکی افواج فی الحال وہاں سے نکلنے کا ارادہ نہیں رکھتیں۔

امریکی ریاست کینٹکی میں ایک انتخابی اجتماع سے خطاب کرتے ہوئے انہوں نے کہا کہ گزشتہ گیارہ دنوں میں امریکی فوج نے ایران کو شدید نقصان پہنچایا ہے۔

ان کا کہنا تھا کہ امریکی افواج نے ایران کے اٹھاون بحری جہاز تباہ کیے اور اکتیس بارودی سرنگوں کو ناکارہ بنایا، جبکہ ایرانی بحری اور فضائی صلاحیت کو بھی بڑا دھچکا پہنچا ہے۔

ڈونلڈ ٹرمپ نے دعویٰ کیا کہ امریکا نے یہ جنگ ابتدائی گھنٹوں میں ہی جیت لی تھی، تاہم جب تک مقررہ اہداف مکمل نہیں ہوتے امریکی افواج ایران سے واپس نہیں جائیں گی۔

تیل کے بحران سے متعلق گفتگو کرتے ہوئے انہوں نے کہا کہ انٹرنیشنل انرجی ایجنسی نے اسٹریٹجک ذخائر سے چار سو ملین بیرل تیل جاری کرنے پر اتفاق کیا ہے جس سے عالمی منڈی میں قیمتوں میں کمی آنے کی توقع ہے۔

امریکی صدر کے مطابق تیل کی قیمتیں کم کرنے کے لیے امریکا اپنے اسٹریٹجک تیل ذخائر سے بھی فائدہ اٹھائے گا۔

انہوں نے امریکی محکمہ توانائی کو آئندہ ہفتے سے اسٹریٹجک ذخائر سے ایک سو بہتر ملین بیرل تیل جاری کرنے کی اجازت دے دی ہے جبکہ حکام کے مطابق اس عمل میں تقریباً ایک سو بیس دن لگ سکتے ہیں۔