ایران نے مشرق وسطیٰ کے ممالک سے معافی مانگ کر ہتھیار ڈال دیئے: ٹرمپ

امریکی صدر ڈونلڈ ٹرمپ نے دعویٰ کیا ہے کہ ایران نے مشرق وسطیٰ کے ممالک سے معافی مانگ کر ہتھیار ڈال دیے ہیں۔

اپنے بیان میں ڈونلڈ ٹرمپ کا کہنا تھا کہ امریکی اور اسرائیلی حملوں کے باعث ایران پیچھے ہٹنے پر مجبور ہوا اور اس نے ہمسایہ ممالک پر حملے نہ کرنے کا وعدہ بھی کیا ہے۔

امریکی صدر کے مطابق ایران مشرق وسطیٰ پر قبضہ کرنا چاہتا تھا، تاہم ہزاروں سال میں پہلی بار ایران کو خطے کے ممالک کے ہاتھوں شکست کا سامنا کرنا پڑا ہے۔

دوسری جانب اس سے قبل ایرانی صدر مسعود پزشکیان نے ایک ریکارڈ شدہ پیغام میں کہا تھا کہ ایران کی عبوری قیادت نے پڑوسی ممالک پر حملے روکنے کی منظوری دے دی ہے، بشرطیکہ ایران پر حملہ ان ممالک کی سرزمین سے نہ کیا جائے۔

تاہم اس بیان کے فوراً بعد ایرانی پاسدارانِ انقلاب نے خبردار کیا تھا کہ اگر ایران پر حملے جاری رہے تو تمام امریکی اور اسرائیلی فوجی اڈے اور مفادات ان کے بنیادی نشانے ہوں گے۔

صدر ٹرمپ نے اپنے تازہ پیغام میں مزید حملوں کا عندیہ دیتے ہوئے کہا کہ ایران کے رویے کے باعث اب ایسے علاقوں اور گروہوں کو نشانہ بنانے پر غور کیا جا رہا ہے جنہیں اب تک ہدف نہیں بنایا گیا تھا۔