امریکا نے ایران کی 48 اہم شخصیات کو ہلاک کر دیا، ایرانی ملٹری کمان ختم ہوگئی: ٹرمپ

واشنگٹن: ڈونلڈ ٹرمپ نے دعویٰ کیا ہے کہ امریکا نے ایران کی 48 اہم شخصیات کو ہلاک کر دیا ہے اور ایرانی ملٹری کمان مکمل طور پر ختم ہو چکی ہے۔

اپنے ویڈیو خطاب میں امریکی صدر نے کہا کہ کارروائیوں کے دوران پاسداران انقلاب اسلامی کی تنصیبات اور ایرانی فضائی دفاعی نظام کو نشانہ بنایا گیا۔ ان کے مطابق 9 بحری جہازوں اور ایرانی بحریہ کی ایک عمارت پر بھی حملہ کیا گیا۔

ڈونلڈ ٹرمپ نے دعویٰ کیا کہ ایران کی اعلیٰ قیادت ختم ہو چکی ہے اور بہت سے افراد ہتھیار ڈالنا چاہتے ہیں۔ انہوں نے کہا کہ اگر پاسدارانِ انقلاب، ایرانی فوج اور پولیس ہتھیار ڈال دیں تو انہیں استثنا دیا جا سکتا ہے، بصورت دیگر سخت نتائج کا سامنا کرنا پڑے گا۔

امریکی صدر نے کہا کہ اہداف کے حصول تک فوجی آپریشن جاری رہے گا، تاہم مزید امریکی ہلاکتوں کا امکان بھی موجود ہے اور امریکا اپنے شہریوں کی ہلاکتوں کا بدلہ لے گا۔

انہوں نے مزید کہا کہ امریکا ایرانی عوام کے ساتھ کھڑا ہے اور ایرانی شہری اس موقع سے فائدہ اٹھا کر اپنا ملک واپس لیں۔ ان کے مطابق جنگ چار ہفتے تک جاری رہ سکتی ہے۔ انہوں نے بتایا کہ سعودی عرب، بحرین، امارات، قطر اور اردن کے رہنماؤں سے بھی رابطہ کیا گیا ہے اور جنگ کے بعد ایران میں جمہوریت کے قیام کی بات کی۔

ایرانی حکام کی جانب سے ان دعوؤں پر فوری ردعمل سامنے نہیں آیا۔