محبت، احساس اور اپنائیت سے لبریز جذبات کے ترجمان منیر نیازی کی آج 19 ویں برسی

محبت، احساس اور اپنائیت سے لبریز جذبات کے ترجمان، اردو و پنجابی کے ممتاز شاعر منیر نیازی کی آج 19ویں برسی منائی جا رہی ہے۔ ان کی شاعری میں ماضی کے گمشدہ مناظر، کھوئے ہوئے رشتوں اور زندگی کے تلخ و شیریں احساسات کی جھلک نمایاں نظر آتی ہے۔

منیر نیازی 9 اپریل 1928ء کو ضلع ہوشیار پور میں پیدا ہوئے اور قیامِ پاکستان کے بعد ہجرت کر کے لاہور آ بسے۔ انہوں نے اردو شاعری کو منفرد اسلوب اور نئی علامتوں سے روشناس کروایا، خصوصاً جنگل اور فطرت سے جڑی علامات کو بڑی خوبصورتی سے اپنے کلام میں سمویا۔

ان کے اردو شاعری کے 13، پنجابی کے 3 اور انگریزی کے 2 مجموعے شائع ہوئے۔ اردو مجموعوں میں بے وفا کا شہر، تیز ہوا اور تنہا پھول، جنگل میں دھنک، سفید دن کی ہوا اور ماہِ منیر نمایاں ہیں۔ ان کی شاعری قاری کے دل پر گہرا اثر چھوڑتی ہے اور ماضی کی دھند میں لپٹے احساسات کو زندہ کر دیتی ہے۔

ادبی خدمات کے اعتراف میں منیر نیازی کو پرائیڈ آف پرفارمنس اور ستارۂ امتیاز جیسے اعلیٰ اعزازات سے نوازا گیا۔ وہ 26 دسمبر 2006ء کو لاہور میں انتقال کر گئے، مگر اپنی لازوال شاعری کے باعث آج بھی دلوں میں زندہ ہیں