ٹیلر سوئفٹ سب سے امیر خاتون گلوکارہ، دولت 2 ارب ڈالر تک جا پہنچی

عالمی شہرت یافتہ امریکی گلوکارہ ٹیلر سوئفٹ کی مجموعی دولت میں غیر معمولی اضافہ ریکارڈ کیا گیا ہے، جس کے بعد وہ تاریخ کی امیر ترین خاتون گلوکارہ بن گئی ہیں۔

فوربز کی تازہ رپورٹ کے مطابق مارچ 2026 تک ان کی مجموعی دولت تقریباً 2 ارب ڈالر تک پہنچ چکی ہے، جس کے بعد وہ دنیا کی امیر ترین خاتون موسیقار قرار دی جا رہی ہیں۔

رپورٹ کے مطابق ٹیلر سوئفٹ کی آمدنی کا بڑا حصہ کاسمیٹکس یا برانڈ معاہدوں کے بجائے ان کی موسیقی، گانوں اور اسٹیج پرفارمنس سے حاصل ہوا ہے۔

ان کی مالی کامیابی میں عالمی کنسرٹ ٹورز، میوزک سیلز اور اپنے گانوں کے حقوق پر بڑھتے ہوئے کنٹرول نے اہم کردار ادا کیا ہے۔ خاص طور پر 2023 اور 2024 کا “ایراز ٹور” ان کے کیریئر کا بڑا سنگ میل ثابت ہوا، جس سے اربوں ڈالر کی آمدن حاصل ہوئی۔

رپورٹ میں مزید بتایا گیا ہے کہ اپنے پرانے البمز دوبارہ ریکارڈ کرنے کے فیصلے کے بعد انہیں اپنے میوزک کے حقوق پر دوبارہ کنٹرول حاصل ہوا، جس سے ان کی رائلٹی آمدن میں بھی نمایاں اضافہ ہوا۔