شامیوں کی وطن واپسی، تباہ شدہ گھروں اور روزگار کی قلت بڑا چیلنج ہے: اقوام متحدہ

اقوامِ متحدہ کے انسانی ہمدردی کے ادارے ‘او سی ایچ اے’ (OCHA) نے اپنی تازہ رپورٹ میں انکشاف کیا ہے کہ طویل عرصے سے جنگ اور تشدد کے باعث کیمپوں میں پناہ گزین شامی شہریوں کی اپنے گھروں کو واپسی کا سلسلہ شروع ہو چکا ہے، تاہم اپنے علاقوں میں پہنچنے والے خاندانوں کو وہاں شدید اور نئی مشکلات کا سامنا ہے۔ رپورٹس کے مطابق صرف جولائی اور اگست کے دوران تقریباً 39 ہزار سے زائد افراد نے بے گھر افراد کے عارضی کیمپوں کو چھوڑ کر اپنے ابائی علاقوں کا رخ کیا ہے۔

اقوامِ متحدہ کا کہنا ہے کہ اگرچہ ان شہریوں کی واپسی ایک مثبت پیش رفت ہے، لیکن بنیادی ڈھانچے کی تباہی کے باعث اب انسانی ضروریات کیمپوں کے بجائے ان علاقوں میں منتقل ہو گئی ہیں جہاں لوگ واپس آ رہے ہیں۔ تباہ شدہ مکانات، ہسپتالوں، سکولوں اور روزگار کی شدید عدم دستیابی شہریوں کی معمول کی زندگی کی طرف بحالی میں سب سے بڑی رکاوٹ ہے۔ رپورٹ میں بتایا گیا ہے کہ حلب اور ادلب جیسے متاثرہ علاقوں میں اقوامِ متحدہ اور اس کے شراکت دار بنیادی سہولیات اور بحالی کے کاموں میں مصروف ہیں۔ ‘او سی ایچ اے’ نے انتباہ جاری کیا ہے کہ شام میں اس وقت بھی ڈیڑھ کروڑ سے زائد افراد کو ہنگامی انسانی امداد کی اشد ضرورت ہے، جبکہ 2.9 ارب ڈالر کے امدادی منصوبے کو شدید فنڈز کی قلت کا سامنا ہے۔