کوشش ہے مشکل حالات میں عام آدمی پر کم سے کم بوجھ پڑے: شرجیل میمن

سندھ کے سینئر صوبائی وزیر شرجیل انعام میمن نے مشکل معاشی حالات میں عام آدمی کو ریلیف دینے کے لیے 35 ارب روپے کے بڑے پیکیج کا اعلان کیا ہے۔ کراچی میں پریس کانفرنس کرتے ہوئے انہوں نے کہا کہ خطے کی موجودہ صورتحال کے باعث وفاقی حکومت کو مجبوری میں پٹرول کی قیمتیں بڑھانی پڑیں، جس کا بوجھ کم کرنے کے لیے سندھ حکومت عملی اقدامات کر رہی ہے۔ پیکیج کے تحت 25 ایکڑ تک زمین رکھنے والے کسانوں کو 1500 روپے فی ایکڑ کے حساب سے ادائیگی شروع کر دی گئی ہے، جبکہ 6.7 ملین موٹر سائیکل سواروں کو فی اکاؤنٹ 2 ہزار روپے فراہم کیے جائیں گے۔ شرجیل میمن نے بتایا کہ ایکسائز دفاتر میں اب تک 15 ہزار سے زائد افراد اپنے کوائف جمع کروا چکے ہیں۔ انہوں نے مزید کہا کہ سندھ ملک کا واحد صوبہ ہے جو سرکاری کے ساتھ ساتھ نجی بسوں کو بھی سبسڈی دے رہا ہے تاکہ کرایوں میں استحکام رہے اور کسانوں کے ساتھ ساتھ تاجروں کے مفادات کا بھی تحفظ یقینی بنایا جا سکے۔