رواں مالی سال کی تیسری سہ ماہی میں 92 فیصد ادائیگیاں ڈیجیٹل رہیں: سٹیٹ بینک

سٹیٹ بینک آف پاکستان (SBP) نے مالی سال 2025-26 کی تیسری سہ ماہی کے دوران ادائیگیوں سے متعلق اپنی تازہ ترین رپورٹ جاری کر دی ہے، جس کے مطابق ملک میں ڈیجیٹل ادائیگیوں کے رجحان میں تاریخی اور نمایاں اضافہ ریکارڈ کیا گیا ہے۔

رپورٹ کے مطابق مالی سال 2025-26 کے ابتدائی تین ماہ کے دوران ملکی بینکاری نظام کے ذریعے مجموعی طور پر 168.8 کھرب روپے مالیت کی 3.7 ارب ریٹیل ادائیگیاں کی گئیں۔ ان ادائیگیوں میں سے ریکارڈ 92 فیصد ادائیگیاں ڈیجیٹل پیمنٹ چینلز کے ذریعے انجام پائیں، جو کہ گزشتہ سال کے اسی عرصے کے مقابلے میں ڈیجیٹل ادائیگیوں کی شرح میں 9 فیصد اضافہ ظاہر کرتی ہیں۔

سٹیٹ بینک کے اعداد و شمار کے مطابق موبائل بینکنگ، انٹرنیٹ بینکنگ، اے ٹی ایم (ATM)، پوائنٹ آف سیل (POS) اور ای کامرس کے ذریعے ادائیگیوں کی مجموعی تعداد 3.4 ارب تک پہنچ گئی ہے۔ اس دوران صرف ڈیجیٹل والٹس کے ذریعے 68 کھرب روپے مالیت کی ادائیگیاں کی گئیں۔ برانچ لیس بینکنگ، الیکٹرانک منی انسٹی ٹیوشنز (EMIs) اور موبائل ایپس کے ذریعے مجموعی طور پر 2.9 ارب ادائیگیاں کی گئیں، جن کی مالیت 19 فیصد اضافے کے ساتھ 42 کھرب روپے تک پہنچ گئی جبکہ ادائیگیوں کی تعداد میں 5 فیصد اضافہ دیکھا گیا۔

(Raast) نے بھی بہترین کارکردگی کا مظاہرہ کیا۔ رپورٹ کے مطابق راست کے ذریعے 742.1 ملین لین دین کیے گئے، جن کی مجموعی مالیت 23.3 کھرب روپے رہی۔راست کے ذریعے پرسن ٹو پرسن ادائیگیوں کی تعداد 10 فیصد اضافے کے بعد 664 ملین تک پہنچ گئی۔پرسن ٹو مرچنٹ ادائیگیوں کی تعداد میں بھی بڑا اچھال دیکھا گیا اور یہ 36.3 ملین سے بڑھ کر 55.9 ملین ہو گئی۔ ملک بھر میں ڈیجیٹل چینلز کے ساتھ ساتھ 20 ہزار 232 بینک برانچز اور 81 لاکھ 9 ہزار 397 بینکاری ایجنٹس نے اوور دی کاؤنٹر (OTC) خدمات فراہم کیں۔بینک برانچز کے ذریعے 128 ملین ادائیگیاں ریکارڈ کی گئیں جن کی مالیت 99.5 کھرب روپے رہی، جبکہ بینکاری ایجنٹس کے نیٹ ورک کے ذریعے 155 ملین ادائیگیاں کی گئیں جن کی مجموعی مالیت 1.1 کھرب روپے ریکارڈ کی گئی۔