روس اور سعودی عرب کے درمیان ویزا فری معاہدہ، 11 مئی سے نافذ العمل

روس اور سعودی عرب کے درمیان تاریخی ویزا فری سفر کے معاہدے کے نفاذ کی تاریخ کا اعلان کر دیا گیا ہے، جس کے تحت 11 مئی 2026 سے دونوں ممالک کے شہری ایک دوسرے کے ملک میں بلا ویزا داخل ہو سکیں گے۔ یہ معاہدہ یکم دسمبر 2025 کو ریاض میں طے پایا تھا، جس کا مقصد دوطرفہ سیاحت اور عوامی روابط کو فروغ دینا ہے۔ معاہدے کی رو سے روسی اور سعودی شہری ایک سال کے دوران مجموعی طور پر 90 دن تک بغیر ویزا قیام کے مجاز ہوں گے، تاہم اس سہولت کے تحت ملازمت، تعلیم یا مستقل رہائش اختیار کرنے کی اجازت نہیں ہوگی۔ واضح رہے کہ کام یا تعلیم کی غرض سے جانے والے افراد اور خاص طور پر حج و عمرہ کے زائرین کو حج سیزن کے دوران طے شدہ طریقہ کار کے مطابق بدستور ویزا حاصل کرنا ہوگا۔ یہ اقدام دونوں ممالک کے درمیان بڑھتے ہوئے سفارتی اور اقتصادی تعلقات میں ایک اہم سنگ میل ثابت ہوگا۔