قطرکا بھی ایران اورامریکا کی کشیدگی کم کرانےکےلیے سفارتی کوششوں کا اعلان

قطربھی پاکستان کے نقش قدم پر۔ ایران اور امریکہ کے درمیان کشیدگی کو کم کرنے کے لیے سفارتی کوششوں کا اعلان کردیا۔

قطری وزارت خارجہ کے ترجمان ماجد انصاری نے کہا کہ ایران کے ساتھ کشیدگی کم کرنے کے لیے علاقائی تعاون جاری ہے۔انھوں نے کہا کہ دوحہ مشرق وسطیٰ میں کشیدگی کو کم کرنے کے لیے سفارتی کوششوں میں سرگرم ہے اور بحران کو بڑھنے سے روکنے اور سفارتی حل تک پہنچنے کے لیے مختلف فریقوں کے ساتھ مل کر کام کر رہا ہے۔

قطری وزارت خارجہ کے ترجمان کے مطابق دوحہ تمام فریقین سے رابطے میں ہے۔ انہوں نے بڑھتے ہوئے تناؤ کو روکنے کے لیے پرامن حل تلاش کرنے اور علاقائی تعاون کی ضرورت پر زور دیتے ہوئے کہا ہے کہ تنازع میں کسی بھی طرح کی شدت علاقائی سلامتی کے لیے تباہ کن نتائج کا باعث بن سکتی ہے۔

قطر کے وزیر اعظم شیخ محمد بن عبدالرحمن الثانی نے دو روزقبل  تہران میں سپریم نیشنل سیکورٹی کونسل کے سیکرٹری علی لاریجانی سے ملاقات کی تھی۔

اطلاعات کے مطابق ایران اور امریکہ جمعے کو ترکی میں مذاکرات کریں گے۔ مذاکرات میں فریقین کے علاوہ میزبان ترکیہ، قطر، سعودی عرب، متحدہ عرب امارات، پاکستان اور عمان کو بھی  شرکت کی دعوت دی گئی ہے۔