روسی صدر ولادیمیر پیوٹن اور ٹرمپ کے درمیان 2 ماہ بعد ٹیلیفونک گفتگو

روس کے صدر ولادیمیر پیوٹن اور امریکا کے صدر ڈونلڈ ٹرمپ کے درمیان گزشتہ شام ٹیلیفون پر گفتگو ہوئی۔

کریملن کے معاون یوری اوشاکوف نے صحافیوں کو بتایا کہ یہ گفتگو کاروباری، کھلی اور تعمیری نوعیت کی تھی، جیسا کہ عموماً روس اور امریکا کی قیادت کے درمیان ہوتا ہے۔اوشاکوف کے مطابق امریکی صدر نے روسی صدر کو فون کر کے عالمی صورتحال میں حالیہ پیش رفت سمیت کئی اہم امور پر تبادلہ خیال کیا۔ یہ گفتگو تقریباً ایک گھنٹہ جاری رہی۔انہوں نے مزید کہا کہ صدر ٹرمپ نے زور دیا کہ دونوں ممالک کے درمیان رابطے باقاعدگی سے جاری رہیں، جس پر دونوں رہنماؤں نے آمادگی ظاہر کی۔

اوشاکوف نے کہا کہ یہ گفتگو مجموعی طور پر کافی بامعنی رہی اور امکان ہے کہ اس کے بین الاقوامی سیاست میں دونوں ممالک کے آئندہ تعاون پر عملی اثرات مرتب ہوں گے۔واضح رہے کہ یہ دو ماہ سے زائد عرصے کے بعد روس اور امریکا کے صدور کے درمیان پہلی ٹیلیفونک گفتگو تھی اور یہ رابطہ امریکا اور اسرائیل کے ایران پر حملوں کے بعد پہلی معلوم ہونے والی بات چیت بھی ہے۔