راجن پور کے سونمیانی کچے میں ڈاکوؤں کے خلاف آپریشن، مغوی بازیاب

پنجاب پولیس نے راجن پور کے علاقے سونمیانی کچہ میں ڈاکوؤں کے خلاف کامیاب آپریشن کرتے ہوئے ایک مغوی شہری کو بحفاظت بازیاب کرالیا۔ پولیس کے ترجمان کے مطابق راجن پور پولیس کی نفری ڈاکوؤں کی کمین گاہ میں داخل ہوئی تو شدید فائرنگ کا تبادلہ ہوا، جس کے دوران ڈاکو اپنی پناہ گاہیں چھوڑ کر فرار ہوگئے۔
ترجمان پنجاب پولیس نے بتایا کہ مغوی گل گانور کو چند روز قبل کچہ بنگلہ اچھا سے اغوا کیا گیا تھا اور ڈاکو اس کی رہائی کے بدلے بھاری تاوان کا مطالبہ کر رہے تھے۔
پولیس کے مطابق ڈاکوؤں نے مغوی پر تشدد کی ایک ویڈیو بھی سوشل میڈیا پر وائرل کی تھی، جس کے بعد کارروائی کا دائرہ تیز کر دیا گیا۔
آپریشن کے دوران پولیس نے مغوی کو محفوظ طریقے سے بازیاب کرایا جبکہ علاقے میں ڈاکوؤں کے خلاف سرچ آپریشن جاری ہے۔
آئی جی پنجاب ڈاکٹر عثمان انور نے مغوی کی بحفاظت بازیابی پر راجن پور پولیس کو شاباش دی اور کہا کہ شہریوں کی جان و مال کے تحفظ کے لیے کچے کے تمام علاقوں سے جرائم پیشہ عناصر کا خاتمہ کیا جائے گا