پاکستان تحریک انصاف کی ایران پر امریکہ اور اسرائیل کے حملے کی مذمت، تحمل اور سفارت کاری پر زور

پاکستان تحریک انصاف نے ایران کے خلاف امریکہ اور اسرائیل کے حملے کی شدید مذمت کرتے ہوئے اسے بین الاقوامی قانون اور ایک خودمختار ریاست کی خودمختاری کی خلاف ورزی قرار دیا ہے۔

پارٹی کی جانب سے جاری بیان میں کہا گیا ہے کہ اسلامی جمہوریہ ایران کے خلاف اسرائیل اور امریکہ کی بلااشتعال کارروائی قابلِ مذمت ہے جبکہ اس معاملے میں امریکہ کی جانب سے اسرائیل کو دی جانے والی غیر مشروط حمایت پر گہری تشویش پائی جاتی ہے۔

بیان میں کہا گیا ہے کہ اس نوعیت کے اقدامات پہلے ہی غیر مستحکم مشرقِ وسطیٰ کو مزید عدم استحکام کی طرف دھکیل سکتے ہیں اور خطے میں کشیدگی کو بڑھا سکتے ہیں۔

تحریکِ انصاف نے اپنے قائد عمران خان کے وژن اور سابقہ پالیسیوں کا حوالہ دیتے ہوئے تمام فریقین پر زور دیا کہ وہ تحمل کا مظاہرہ کریں اور کشیدگی میں کمی کیلئے فوری طور پر سفارتی روابط کو فروغ دیں۔

بیان میں مزید کہا گیا کہ مشرقِ وسطیٰ کے عوام طویل جنگوں، بیرونی مداخلتوں اور جغرافیائی سیاسی رقابتوں کا پہلے ہی بھاری خمیازہ بھگت چکے ہیں۔

تحریکِ انصاف نے مطالبہ کیا کہ پاکستان کو امن، علاقائی استحکام، خودمختاری کے احترام اور بین الاقوامی قانون کی پاسداری پر مبنی اصولی خارجہ پالیسی اپنانی چاہیے۔