عالمی یومِ زیرو ویسٹ: صدر زرداری کا خوراک کے ضیاع میں کمی پر زور

اسلام آباد: صدرِ مملکت آصف علی زرداری نے عالمی یومِ زیرو ویسٹ کے موقع پر قوم کے نام اپنے پیغام میں خوراک کے ضیاع کو ایک سنگین قومی چیلنج قرار دیتے ہوئے اسے ہر سطح پر کم کرنے کی ضرورت پر زور دیا ہے۔ صدر زرداری نے کہا کہ رواں برس اس دن کی خاص توجہ خوراک کے ضیاع پر ہے، جو نہ صرف عام شہری کی زندگی سے جڑا ہے بلکہ ملک کی معیشت اور ماحول پر بھی گہرے اثرات مرتب کرتا ہے۔

صدر مملکت نے نشاندہی کی کہ منڈی تک پہنچنے سے قبل فصلوں کا خراب ہونا اور ناقص ذخیرہ کاری (Storage) پاکستان جیسے زرعی ملک کے لیے بڑے مسائل ہیں۔ انہوں نے کہا کہ جب ہم خوراک ضائع کرتے ہیں تو اس کے ساتھ ساتھ پانی، زمین اور توانائی جیسے قیمتی وسائل بھی ضائع ہوتے ہیں۔ مزید برآں، لینڈ فل میں جانے والی خوراک ماحولیاتی آلودگی اور موسمیاتی تبدیلی (Climate Change) کا باعث بنتی ہے۔

صدر زرداری نے زرعی معیشت کو مستحکم کرنے کے لیے ‘بعد از برداشت’ (Post-harvest) نقصانات کو کم کرنے اور جدید کولڈ چین سسٹم اپنانے کی ضرورت پر زور دیا۔ انہوں نے سرکاری و نجی اداروں اور کاروباری مراکز کو ذمہ دارانہ منصوبہ بندی اختیار کرنے اور اضافی خوراک کو ضائع کرنے کے بجائے مستحق افراد تک پہنچانے کی اپیل کی۔ صدر نے عوام سے بھی درخواست کی کہ وہ گھریلو سطح پر محتاط خریداری اور درست ذخیرہ کاری کو یقینی بنا کر اس قومی ذمہ داری میں اپنا حصہ ڈالیں۔