آصف علی زرداری کی دوحہ میں عراقی صدر سے ملاقات تعلقات مضبوط بنانے پر اتفاق

صدرِ مملکت آصف علی زرداری نے عراقی صدر ڈاکٹر عبداللطیف جمال رشید سے دوحہ میں اہم ملاقات کی، جس میں پاکستان اور عراق کے درمیان دیرینہ برادرانہ تعلقات کے تمام پہلوؤں کا تفصیلی جائزہ لیا گیا۔

ملاقات کے دوران دونوں رہنماؤں نے دوطرفہ تعلقات کو مزید مضبوط بنانے کے عزم کا اعادہ کیا اور تجارت و سرمایہ کاری کے فروغ پر اتفاق کیا۔ اس موقع پر بزنس ٹو بزنس روابط بڑھانے اور ویزہ سہولتوں میں اضافے کی ضرورت پر بھی زور دیا گیا۔عراقی صدر نے صدر آصف علی زرداری کو دورۂ عراق کی دعوت دی، جسے صدرِ مملکت نے قبول کرتے ہوئے کہا کہ وہ عراقی پارلیمانی انتخابات کے بعد جلد دورۂ عراق کریں گے۔صدرِ مملکت نے ملاقات میں پاکستانی زائرین کے لیے عراقی حکومت کے تعاون کو سراہا اور کہا کہ عراق میں مقیم پاکستانی برادری دونوں ممالک کے درمیان خیرسگالی کا مضبوط پل ہے۔دونوں رہنماؤں نے علاقائی امن و استحکام اور باہمی تعاون پر بھی تبادلہ خیال کیا۔ملاقات میں خاتون اول آصفہ بھٹو زرداری، چیئرمین پیپلز پارٹی بلاول بھٹو زرداری اور پاکستان کے سفیر برائے قطر بھی موجود تھے