پاکستان کی بہتر ہوتی معاشی صورتحال پر مثبت فیڈ بیک

وزیر خزانہ محمد اورنگزیب سے اسٹینڈرڈ چارٹرڈ بینک کے وفد نے ملاقات کی، جس میں پاکستان کی بہتر ہوتی ہوئی معاشی صورتحال پر مثبت پیش رفت کا اعتراف کیا گیا۔ وزارتِ خزانہ کے مطابق بینک وفد نے ملکی معاشی استحکام پر مثبت فیڈ بیک دیتے ہوئے حکومت کے جاری اصلاحاتی اقدامات کو سراہا۔

وزیر خزانہ نے اسٹینڈرڈ چارٹرڈ کے پاکستان کے ساتھ مسلسل تعاون پر شکریہ ادا کیا اور کہا کہ ای ایف ایف پروگرام میں بینک کا کردار ملکی مارکیٹ کانفیڈنس میں اضافے کا باعث بنا۔ ملاقات میں وزیر خزانہ نے حکومتی اصلاحاتی ترجیحات، مالی نظم و ضبط، اور معاشی استحکام کے لیے جاری اقدامات پر وفد کو آگاہ کیا۔

بات چیت کے دوران نجکاری پروگرام، غیر ملکی سرمایہ کاری (FDI)، اور انٹرنیشنل کیپٹل مارکیٹس تک پاکستان کی رسائی پر بھی تفصیلی گفتگو ہوئی۔ وزیر خزانہ نے نجکاری پروگرام سے متعلق مضبوط مالی مشاورت فراہم کرنے کی ضرورت پر زور دیا۔

اجلاس میں وفد کو پانڈا بانڈ اور گلوبل میڈیم ٹرم نوٹ پروگرام پر پیش رفت سے بھی آگاہ کیا گیا۔ وزارتِ خزانہ کے مطابق اسٹینڈرڈ چارٹرڈ بینک نے پاکستان کو ترجیحی مارکیٹ قرار دیتے ہوئے حکومتی معاشی ایجنڈے کے لیے ایڈوائزری اور فنانسنگ سپورٹ فراہم کرنے کی یقین دہانی کرائی۔

بینک نے جی سی سی ممالک سمیت عالمی سرمایہ کاروں کے ساتھ پاکستان کو جوڑنے میں بھرپور دلچسپی کا اظہار کیا۔ ملاقات میں توانائی اور ٹیکسیشن سے متعلق مسائل کے حل کے لیے حکومتی اقدامات پر بھی تبادلہ خیال ہوا۔

فریقین نے اتفاق کیا کہ معاشی اصلاحات کی رفتار کو برقرار رکھنا اور سرمایہ کاروں کا اعتماد بڑھانا مستقبل کے استحکام کے لیے ضروری ہے۔