وزیراعظم شہباز شریف کا آبی قلت، اصلاحات اور بھارتی اقدامات پر اظہارِ تشویش

اسلام آباد: وزیراعظم شہباز شریف نے ‘عالمی یومِ آب’ کے موقع پر قوم کے نام اپنے پیغام میں خبردار کیا ہے کہ پاکستان کو آبی قلت کے سنگین چیلنجز کا سامنا ہے، جن میں موسمیاتی تبدیلیوں اور گلیشیئر نظام میں ہونے والے ردوبدل نے مزید شدت پیدا کر دی ہے۔ وزیراعظم نے صاف پانی تک رسائی کو بنیادی انسانی حق قرار دیتے ہوئے آبی وسائل کے انتظام اور فیصلہ سازی کے عمل میں خواتین کی نمائندگی کو یقینی بنانے پر زور دیا۔

حکومتی اقدامات کی تفصیلات بتاتے ہوئے وزیراعظم نے کہا کہ قومی آبی پالیسی کے تحت اصلاحات جاری ہیں اور مستقبل کے لیے پانی محفوظ بنانے کی خاطر ملک بھر میں 18 چھوٹے، درمیانے اور بڑے ڈیمز پر کام تیزی سے جاری ہے۔ انہوں نے ہدف بیان کیا کہ مؤثر نہری نظام کے ذریعے پانی کے ضیاع میں 33 فیصد کمی اور زرعی استعمال میں 30 فیصد اضافے کی کوشش کی جا رہی ہے۔

وزیراعظم شہباز شریف نے ارسا (IRSA) کے ٹیلی میٹری سسٹم کی تنصیب کا بھی ذکر کیا، جس سے دریاؤں کے بہاؤ کی بروقت نگرانی اور بین الصوبائی پانی کی تقسیم میں شفافیت آئے گی۔ انہوں نے دو ٹوک الفاظ میں واضح کیا کہ پاکستان اپنے آبی حقوق کے تحفظ کے لیے مکمل طور پر پرعزم ہے اور کسی بھی قسم کی بیرونی آبی جارحیت کی سخت مذمت کرتا ہے۔