شہباز شریف کے دورہ روس کی تیاریوں بارے جائزہ اجلاس، مختلف امور پر غور

وزیراعظم شہباز شریف آئندہ ماہ دسمبر کے پہلے ہفتے میں روس کا ایک اہم سرکاری دورہ کریں گے، جس کے دوران ان کی روسی صدر ولادیمیر پوٹن سے بھی ملاقات متوقع ہے۔

باخبر ذرائع کے مطابق وزیراعظم شہباز شریف کی زیر صدارت روس کے اس متوقع دورے کی تیاریوں کے حوالے سے ایک اعلیٰ سطح کا اہم اجلاس منعقد ہوا، جس میں دورے سے جڑے تمام امور، پروٹوکول اور تجارتی ایجنڈے کا تفصیلی جائزہ لیا گیا۔ ذرائع کا کہنا ہے کہ اس دورے کے دوران وزیراعظم شہباز شریف کے ہمراہ ایک بڑا اور اعلیٰ سطحی تجارتی وفد بھی ماسکو کا دورہ کرے گا، جو وہاں روسی کاروباری شخصیات اور سرمایہ کاروں سے ملاقاتیں کرے گا۔ علاوہ ازیں، وزیراعظم شہباز شریف اپنے اس دورے کے دوران پاکستان اور روس کے مشترکہ بزنس فورم سے کلیدی خطاب بھی کریں گے۔

اس دورے کو دوطرفہ تعلقات، تجارتی تعاون اور معاشی شراکت داری کے فروغ کے حوالے سے انتہائی اہمیت کا حامل قرار دیا جا رہا ہے۔