وزیراعظم سے کویت کے ولی عہد کا ٹیلی فونک رابطہ، کویتی عوام سے اظہارِ یکہجتی

اسلام آباد: وزیراعظم شہباز شریف سے کویت کے ولی عہد شیخ صباح الخالد نے ٹیلیفون پر رابطہ کیا ہے۔ اس اہم گفتگو کے دوران وزیراعظم نے کویت کے عوام کے ساتھ مکمل یکجہتی اور حمایت کا اظہار کرتے ہوئے قیمتی جانوں کے ضیاع پر دلی افسوس اور تعزیت کا اظہار کیا۔ وزیراعظم نے کویتی ولی عہد کو مشرقِ وسطیٰ میں جاری کشیدگی اور جنگ کے خاتمے کے لیے پاکستان کی مخلصانہ سفارتی کوششوں سے بھی تفصیل کے ساتھ آگاہ کیا۔

کویت کے ولی عہد شیخ صباح الخالد نے وزیراعظم شہباز شریف کی قیادت کو سراہتے ہوئے امریکہ اور ایران کے درمیان جاری کشیدگی کو کم کرنے کے لیے پاکستان کے ثالثی کے کردار کی بھرپور حمایت کا یقین دلایا۔ انہوں نے کہا کہ خطے میں امن و استحکام کے لیے پاکستان کی کوششیں قابلِ ستائش ہیں۔

دونوں رہنماؤں نے اس بات پر اتفاق کیا کہ پاکستان اور کویت کے درمیان برادرانہ تعلقات کو مزید مضبوط بنایا جائے گا اور اقتصادی و سفارتی محاذ پر تعاون کو وسعت دی جائے گی۔ وزیراعظم شہباز شریف نے اس عزم کا اعادہ کیا کہ پاکستان خطے میں مستقل امن و استحکام کے لیے اپنی کوششیں جاری رکھے گا تاکہ عالمی معیشت اور انسانی جانوں کو مزید خطرات سے بچایا جا سکے۔