وزیراعظم کی زیرصدارت اجلاس، وزرائے اعلیٰ، وفاقی وزراء کی شرکت، توانائی بحران پر غور

اسلام آباد: وزیراعظم شہباز شریف نے پیٹرولیم اور توانائی کے بڑھتے ہوئے بحران پر قابو پانے کے لیے وفاقی وزراء اور تمام صوبائی وزرائے اعلیٰ کا ہنگامی اجلاس طلب کیا۔ اجلاس میں مشرقِ وسطیٰ کی جنگی صورتحال کے باعث سپلائی چین میں ممکنہ تعطل اور پیٹرولیم مصنوعات کی قیمتوں میں غیر معمولی اضافے سے پیدا ہونے والے چیلنجز کا تفصیلی جائزہ لیا گیا۔

ذرائع کے مطابق، وفاقی حکومت نے صوبوں کو تجویز دی ہے کہ وہ عوام کو ریلیف فراہم کرنے کے لیے پیٹرولیم سبسڈی میں اپنا مالی حصہ ڈالیں، جبکہ ایک تجویز یہ بھی زیرِ غور آئی کہ عالمی مارکیٹ میں قیمتوں کے اضافے کا پورا بوجھ صارفین پر منتقل کر دیا جائے۔ اجلاس کے دوران حکومت کے ‘کفایت شعاری پلان’ اور توانائی کی بچت کے مجوزہ اقدامات پر بھی بریفنگ دی گئی۔

نائب وزیراعظم و وزیر خارجہ اسحاق ڈار نے اپنے حالیہ دورۂ چین کے نتائج اور ایران-امریکہ مذاکرات کے لیے پاکستان کی ثالثی کی کوششوں سے شرکاء کو آگاہ کیا۔ اس سے قبل، چیئرمین پیپلز پارٹی بلاول بھٹو زرداری نے وزیراعلیٰ سندھ مراد علی شاہ کے ہمراہ وزیراعظم سے علیحدہ ملاقات کی، جس میں ملکی سیاسی و معیشتی صورتحال پر مشاورت کی گئی۔