وزیراعظم کی دانش سکولز کی تعمیر کا کام 24 گھنٹے جاری رکھنے کی ہدایت

وزیراعظم محمد شہباز شریف نے ملک بھر میں دانش اسکولوں کی تعمیر کا کام مزید تیز کرنے اور ان کی بروقت تکمیل کو یقینی بنانے کے لیے تعمیراتی سرگرمیاں چوبیس گھنٹے (24 گھنٹے) جاری رکھنے کی سخت ہدایت جاری کر دی ہے۔

وزیراعظم محمد شہباز شریف کی زیر صدارت ملک بھر میں دانش اسکولوں کے نیٹ ورک کی تعمیر کی پیش رفت کا جائزہ لینے کے لیے ایک اہم اجلاس بذریعہ زوم آن لائن منعقد ہوا۔ اجلاس سے خطاب کرتے ہوئے وزیراعظم نے دوٹوک الفاظ میں کہا کہ ہمارے بچے ہی اس ملک کا روشن مستقبل ہیں اور دانش اسکولوں میں کی جانے والی یہ سرمایہ کاری دراصل پاکستان کے تابناک مستقبل کی ضمانت ہے، اس لیے دانش اسکولوں کے معیار پر کسی بھی قسم کا سمجھوتہ ہرگز قابلِ قبول نہیں ہوگا۔

شہباز شریف نے واضح کیا کہ ان اسکولوں میں صرف انتہائی غریب، نادار اور مستحق گھرانوں کے لائق بچوں کو مکمل طور پر میرٹ کی بنیاد پر داخلہ دیا جائے گا، جبکہ طلبہ کی جدید انداز میں تعلیم و تربیت کے لیے مصنوعی ذہانت (AI) اور انفارمیشن ٹیکنالوجی (IT) پر مبنی جدید ترین طریقہ ہائے کار اپنائے جائیں گے۔ وزیراعظم نے دانش اسکولوں کے بنیادی ڈھانچے، فراہم کردہ سہولیات اور سروسز کے معیار کی جانچ پڑتال کے لیے ایک شفاف ’تھرڈ پارٹی ویلیڈیشن‘ کو یقینی بنانے کی بھی ہدایت کی۔

اجلاس کے دوران وزیراعظم نے وزارتِ مواصلات کو خصوصی احکامات دیے کہ گلگت بلتستان اور آزاد جموں و کشمیر میں دانش اسکولوں تک طلبہ اور اساتذہ کی آسان اور محفوظ رسائی کے لیے سڑکوں کا بہترین اور پائیدار نظام قائم کیا جائے، جبکہ خیبر پختونخوا کے ضم شدہ اضلاع (سابق فاٹا) میں بھی دانش اسکولوں کی تعمیر کے لیے ایک جامع حکمت عملی جلد از جلد پیش کی جائے۔ اجلاس میں وزیراعظم کو گلگت بلتستان، آزاد جموں و کشمیر، سندھ اور بلوچستان میں دانش اسکولوں پر جاری تعمیراتی کام کی پیش رفت پر تفصیلی بریفنگ دی گئی۔ اجلاس میں وفاقی وزراء احسن اقبال، احد خان چیمہ، عطاء اللہ تارڑ، شزا فاطمہ خواجہ، ڈاکٹر مصدق مسعود ملک سمیت متعلقہ اداروں کے اعلیٰ افسران نے بھی شرکت کی