اپنا گھر ہر شہری کا حق، آسان شرائط پر قرضوں کی فراہمی حکومتی ترجیح ہے: وزیراعظم

اسلام آباد: وزیراعظم محمد شہباز شریف نے تعمیرات اور رہائشی شعبے کو معیشت کے لیے ریڑھ کی ہڈی قرار دیتے ہوئے کہا ہے کہ “اپنا گھر ہر شہری کا حق ہے” اور حکومت اس مقصد کے لیے آسان شرائط پر قرضوں کی فراہمی کو اپنی اولین ترجیح بنا رہی ہے۔ وزیراعظم کی زیرِ صدارت اسلام آباد میں رہائشی شعبے میں سرمایہ کاری کے فروغ اور روزگار کے مواقع پیدا کرنے سے متعلق ایک اہم جائزہ اجلاس منعقد ہوا۔

اجلاس کے دوران وزیراعظم نے واضح کیا کہ تعمیرات کے شعبے میں سرمایہ کاری سے نہ صرف معیشت کا پہیہ چلے گا بلکہ ملک میں روزگار کے لاکھوں نئے مواقع بھی پیدا ہوں گے۔ انہوں نے حکام کو ہدایت کی کہ بیرونی سرمایہ کاروں اور خاص طور پر سمندر پار پاکستانیوں کی سرمایہ کاری کے تحفظ کو ہر صورت یقینی بنایا جائے اور اس سلسلے میں حائل تمام قانونی و انتظامی رکاوٹیں دور کی جائیں۔

بریفنگ میں بتایا گیا کہ ملک میں مارگیج فنانس (Mortgage Finance) کے ایک مکمل ایکو سسٹم اور ‘ڈویلپر لیڈ فنانسنگ’ کے جامع نظام پر کام تیزی سے جاری ہے۔ اگلے مرحلے میں بینکوں کو کم لاگت گھروں کے لیے قرضوں کی فراہمی کے باقاعدہ اہداف دیے جائیں گے۔ وزیراعظم نے ہدایت کی کہ اس حکمت عملی میں وفاق کے ساتھ ساتھ چاروں صوبوں، آزاد کشمیر اور گلگت بلتستان کو بھی مکمل طور پر شامل کیا جائے۔