وزیراعظم کی زیرصدارت سیاسی و عسکری قیادت کا اجلاس، ایران امریکا جنگ پر غور

اسلام آباد: وزیراعظم شہباز شریف کی صدارت میں مشرقِ وسطیٰ کی بگڑتی ہوئی صورتحال اور ملکی توانائی بحران پر ایک انتہائی اہم مشاورتی اجلاس منعقد ہوا، جس میں ملک کی اعلیٰ سیاسی و عسکری قیادت شریک ہوئی۔ ذرائع کے مطابق اجلاس میں فیلڈ مارشل سید عاصم منیر سمیت دیگر اعلیٰ حکام نے شرکت کی، جہاں خطے میں جاری ایران، اسرائیل اور امریکہ کی مثلث میں بڑھتی ہوئی جنگی صورتحال کا تفصیلی جائزہ لیا گیا۔

اجلاس میں پاکستان کے ممکنہ سفارتی کردار پر خصوصی مشاورت کی گئی، جس میں امریکہ اور اسرائیل کی ایران کے خلاف جنگ کے تصفیے کے لیے پاکستان کی میزبانی میں ہونے والے مجوزہ مذاکرات کے خدوخال پر بات چیت ہوئی۔ عسکری قیادت نے سکیورٹی کی صورتحال اور پاکستان کے آئندہ کے لائحہ عمل سے متعلق بریفنگ دی۔ اس کے علاوہ ملک میں جاری شدید توانائی بحران سے نمٹنے کے لیے حکومتی حکمتِ عملی پر بھی غور کیا گیا۔

ذرائع نے مزید بتایا کہ وزیراعظم شہباز شریف آج شام صدرِ مملکت آصف علی زرداری سے بھی ملاقات کریں گے، جس میں اتحادی جماعتوں کو موجودہ صورتحال پر اعتماد میں لیا جائے گا۔ اس ملاقات میں مشرقِ وسطیٰ کے بحران کے پاکستان پر اثرات اور قومی سلامتی کے امور پر حتمی مشاورت کی جائے گی تاکہ ایک متفقہ قومی موقف اپنایا جا سکے۔