پی سی بی چیئرمین محسن نقوی پاک بھارت میچ دیکھنے سری لنکا روانہ

ٹی ٹوئنٹی ورلڈ کپ کے سب سے بڑے پاک بھارت ٹاکرے سے قبل چیئرمین پاکستان کرکٹ بورڈ محسن نقوی سری لنکا روانہ ہو گئے ہیں۔ پاکستان کرکٹ بورڈ (پی سی بی) کے مطابق چیئرمین کل ہونے والا ہائی وولٹیج مقابلہ اسٹیڈیم میں بیٹھ کر دیکھیں گے۔

ذرائع کے مطابق بڑے میچ سے قبل چیئرمین پی سی بی قومی ٹیم کے کھلاڑیوں سے ملاقات کریں گے اور ان کا حوصلہ بڑھائیں گے۔ وہ کھلاڑیوں اور ٹیم مینجمنٹ سے علیحدہ علیحدہ ملاقاتیں بھی کریں گے تاکہ میچ سے متعلق تیاریوں اور حکمت عملی پر تبادلہ خیال کیا جا سکے۔

ذرائع کا کہنا ہے کہ محسن نقوی اپنے دورہ سری لنکا کے دوران وہاں کے حکام اور سری لنکا کے عہدیداران سے بھی ملاقات کریں گے، جس میں باہمی تعاون اور کرکٹ امور پر گفتگو متوقع ہے۔

واضح رہے کہ پاک بھارت مقابلہ ٹی ٹوئنٹی ورلڈ کپ کا سب سے بڑا میچ تصور کیا جا رہا ہے اور شائقین کرکٹ کی نظریں اس اہم معرکے پر جمی ہوئی ہیں۔