کینیڈا میں صادقین آرٹ نمائش کا افتتاح

پاکستان کے ہائی کمشنر محمد سلیم نے کینیڈا کے شہر مسی ساگا میں نامور فنکار سید صادقین احمد نقوی کی فنی میراث کو خراجِ تحسین پیش کرنے کے لیے ایک خصوصی نمائش کا افتتاح کیا ہے۔ صادقین فاؤنڈیشن کے زیرِ اہتمام منعقدہ اس تین روزہ نمائش میں صادقین کی اسلامی خطاطی، پینٹنگز، ڈرائنگز اور اردو شاعری کے نادر نمونے پیش کیے گئے ہیں۔ اس تقریب میں آغا خان فاؤنڈیشن اکیڈمی ٹورنٹو کے طلبہ، آرٹ ماہرین اور سول سوسائٹی کے افراد بڑی تعداد میں شریک ہو رہے ہیں۔ نمائش کے دوران ممتاز دانشور اور شاعر اشفاق حسین صادقین کی کثیر جہتی شخصیت اور ان کے فنی فلسفے پر روشنی ڈالیں گے۔