ویمن ٹی 20 ورلڈ کپ قومی ٹیم اپنا آخری گروپ میچ آج نیدر لینڈز کیخلاف کھیلے گی

ویمن ٹی 20 ورلڈ کپ میں پاکستانی ویمن کرکٹ ٹیم اپنا آخری گروپ میچ آج نیدر لینڈز کے خلاف کھیلے گی۔ دونوں ٹیمیں پاکستانی وقت کے مطابق دوپہر اڑھائی بجے برسٹل کے میدان میں آمنے سامنے ہوں گی۔ قومی ویمن ٹیم نے اس اہم میچ سے قبل اپنی گذشتہ خامیوں اور کمزوریوں کو دور کرنے کے لیے بھرپور پریکٹس سیشن میں حصہ لیا .

واضح رہے کہ پاکستانی ویمن ٹیم کے لیے یہ ٹورنامنٹ اب تک مایوس کن رہا ہے، جہاں انہوں نے ایونٹ میں اب تک 4 میچز کھیلے ہیں اور بدقسمتی سے چاروں میں ہی انہیں شکست کا سامنا کرنا پڑا ہے۔ قومی ٹیم کی نظریں اب آخری میچ میں فتح حاصل کر کے ایونٹ کا اختتام مثبت انداز میں کرنے پر ہیں۔