موسلادھار بارشوں کا خدشہ، بالائی علاقوں میں لینڈ سلائیڈنگ کا الرٹ جاری

محکمہ موسمیات نے آج سے منگل کے دوران متوقع موسلادھار بارشوں کے پیشِ نظر بالائی خیبر پختونخوا، گلگت بلتستان اور کشمیر کے پہاڑی علاقوں میں لینڈ سلائیڈنگ، جبکہ مقامی ندی نالوں اور برساتی ریلوں میں طغیانی کا خدشہ ظاہر کر دیا ہے۔ رپورٹ کے مطابق، بحیرہ عرب سے آنے والی مضبوط مرطوب ہوائیں مسلسل ملک کے بالائی اور زیریں علاقوں میں داخل ہو رہی ہیں، جس کے ساتھ ساتھ ایک مغربی لہر بھی ملک کے مختلف حصوں پر اثر انداز ہو رہی ہے۔ تاہم، ملک کے بیشتر میدانی علاقوں میں موسم گرم اور مرطوب رہنے کا امکان ہے۔ آج کشمیر، بالائی خیبر پختونخوا، جنوب مشرقی پنجاب، بالائی سندھ اور گلگت بلتستان میں چند مقامات پر تیز ہواؤں اور گرج چمک کے ساتھ بارش کی پیشگوئی کی گئی ہے۔

گزشتہ 24 گھنٹوں کے دوران بالائی پنجاب، بلوچستان، بالائی خیبر پختونخوا، کشمیر اور گلگت بلتستان کے چند مقامات پر تیز ہواؤں اور گرج چمک کے ساتھ بارش ریکارڈ کی گئی۔ سب سے زیادہ بارش پنجاب کے شہر اوکاڑہ میں 29 ملی میٹر، بلوچستان کے علاقے بارکھان میں 13 ملی میٹر، بابوسر میں 8 ملی میٹر، گڑھی دوپٹہ میں 5 ملی میٹر، گوپس میں 4 ملی میٹر اور بنجی میں 3 ملی میٹر ریکارڈ کی گئی، جبکہ سیالکوٹ، ژوب، خضدار، سکردو، چلاس، استور، مالم جبہ اور کالام میں بھی بونداباندی اور بارش ہوئی۔ دوسری جانب، ملک کے گرم ترین علاقوں میں آج سب سے زیادہ درجہ حرارت تربت میں 46، سبی میں 45، جبکہ نوکنڈی، دالبندین، شہید بینظیر آباد اور دادو میں 43 ڈگری سینٹی گریڈ رہا۔ دیگر شہروں میں اسلام آباد 37، بہاولپور 40، ڈی جی خان و ملتان 39، ڈی آئی خان 40، پشاور و بنوں 39، سکھر 41 اور مظفرآباد میں 36 ڈگری سینٹی گریڈ درجہ حرارت ریکارڈ کیا گیا۔