ملک بھر میں گرج چمک اور بارش کا الرٹ، پہاڑی علاقوں میں برفباری اور لینڈ سلائیڈنگ کا خطرہ

نیشنل ڈیزاسٹر مینجمنٹ اتھارٹی نے ملک کے مختلف شہروں میں گرج چمک کے ساتھ مزید بارش اور برفباری کا الرٹ جاری کر دیا ہے۔ این ڈی ایم اے کے مطابق مغربی ہواؤں کا سلسلہ اگلے 12 سے 24 گھنٹوں کے دوران ملک کے بیشتر علاقوں میں داخل ہوگا۔

رپورٹ میں کہا گیا ہے کہ ملک کے بیشتر علاقوں میں تیز ہواؤں اور آندھی جھکڑ کے ساتھ بارش کا امکان ہے۔ گلگت بلتستان، آزاد کشمیر اور خیبر پختونخوا کے بالائی و پہاڑی علاقوں میں برفباری متوقع ہے۔

این ڈی ایم اے نے اسلام آباد، مری، راولپنڈی، اٹک، جہلم، چکوال، گوجر خان، گجرات اور گوجرانوالہ میں بارش کا امکان ظاہر کیا ہے۔ حافظ آباد، سیالکوٹ، منڈی بہاؤالدین اور لاہور میں بھی گرج چمک اور آندھی کے ساتھ بارش متوقع ہے۔

اس کے علاوہ خوشاب، سرگودھا، جھنگ، فیصل آباد، قصور، اوکاڑہ، بہاولپور، بورے والا، ملتان، ڈی آئی خان، نارووال، چنیوٹ، ننکانہ صاحب، پاک پتن اور ساہیوال میں بارش کی پیشگوئی ہے۔

پہاڑی علاقوں میں مسلسل بارش کے باعث لینڈ سلائیڈنگ کے خطرات میں اضافہ ہو سکتا ہے۔ این ڈی ایم اے نے تمام صوبائی و ضلعی اداروں کو ممکنہ موسمی صورتحال سے نمٹنے کے لیے الرٹ رہنے کی ہدایت کی ہے۔