نائب وزیر اعظم اسحاق ڈار کی ترک ہم منصب سے ملاقات، علاقائی امن اور تعاون پر زور

اسلام آباد: نائب وزیر اعظم و وزیر خارجہ اسحاق ڈار اور ترکیہ کے وزیر خارجہ حکان فیدان کے درمیان اہم ملاقات ہوئی، جس میں دوطرفہ تعلقات اور علاقائی صورتحال پر تبادلہ خیال کیا گیا۔

دفتر خارجہ کے ترجمان کے مطابق دونوں ممالک نے باہمی تعلقات کو مزید مستحکم بنانے کے عزم کا اعادہ کیا اور مختلف شعبوں میں تعاون بڑھانے پر اتفاق کیا۔

ملاقات کے دوران خطے کی موجودہ صورتحال، خصوصاً ایران سے متعلق امور پر بھی غور کیا گیا۔

ترجمان کے مطابق دونوں رہنماؤں نے کشیدگی میں کمی، امن و استحکام کے فروغ اور مسائل کے حل کے لیے سفارتکاری اور مکالمے کو ناگزیر قرار دیا۔

اس موقع پر پاکستان اور ترکیہ نے قریبی رابطہ کاری برقرار رکھنے اور خطے میں امن کے لیے مشترکہ کوششیں جاری رکھنے کے عزم کا اظہار کیا۔