ٹرانسپورٹرز نے بھی عوام پر بم گرا دیا، کرایوں میں 65 فیصد تک اضافہ

لاہور/اسلام آباد: پیٹرول کی قیمت 458 روپے اور ڈیزل 520 روپے ہونے کے فوری بعد ٹرانسپورٹ مافیا اور یونینز نے من مانے کرایوں کا اطلاق کر دیا ہے۔ ذرائع کے مطابق مختلف شہروں کے درمیان سفر کرنے والے مسافروں کو اب فی سواری ایک ہزار سے ڈھائی ہزار روپے تک اضافی بوجھ برداشت کرنا پڑے گا۔

ٹرانسپورٹرز کا موقف ہے کہ صرف ڈیزل ہی نہیں بلکہ ٹائر، لبریکنٹس اور دیگر سپیئر پارٹس کی قیمتیں بھی آسمان سے باتیں کر رہی ہیں، جس کی وجہ سے موجودہ کرایوں میں گاڑیاں چلانا گھاٹے کا سودا بن چکا ہے۔ دوسری جانب، بس اڈوں پر مسافروں اور ٹرانسپورٹ عملے کے درمیان تلخ کلامی اور جھگڑوں کے واقعات بھی سامنے آ رہے ہیں، جہاں شہریوں کا کہنا ہے کہ حکومت کی جانب سے موٹر سائیکل سواروں کو دی جانے والی سبسڈی ان کے کسی کام کی نہیں کیونکہ وہ پبلک ٹرانسپورٹ پر انحصار کرتے ہیں۔