پاکستان اور جنوبی افریقہ ویمنز انڈر19 کا پہلا ٹی 20 کل، ٹرافی کی رونمائی کردی گئی

پاکستان اور جنوبی افریقہ کی ویمنز انڈر 19 کرکٹ ٹیموں کے درمیان پانچ ٹی ٹوئنٹی میچوں پر مشتمل سیریز کا پہلا معرکہ کل کراچی میں کھیلا جائے گا، جس کے لیے تمام تر تیاریاں مکمل کر لی گئی ہیں۔ اس تاریخی سیریز کے باضابطہ آغاز سے قبل کراچی میں دونوں ٹیموں کی کپتانوں نے چمکتی دمکتی سیریز ٹرافی کی شاندار رونمائی کی۔ ٹرافی کی رونمائی کے موقع پر دونوں ٹیموں کی کپتان پراعتماد نظر آئیں اور انہوں نے ٹرافی کے ساتھ تصاویر بھی بنوائیں۔

پاکستان انڈر 19 ویمن ٹیم کی کپتان فضا فیاض نے میڈیا سے گفتگو کرتے ہوئے کہا کہ ہوم گراؤنڈ پر ہونے والی یہ سیریز ہمارے نوجوان کھلاڑیوں کے لیے سیکھنے اور اپنی صلاحیتیں منوانے کا بہترین موقع ہے، اور ہم پُرعزم ہیں کہ پوری ٹیم میدان میں بہترین کارکردگی کا مظاہرہ کر کے سیریز میں شاندار نتائج حاصل کرے گی۔ دوسری جانب، مہمان ٹیم جنوبی افریقہ کی کپتان میکا فین فارسٹ نے پاکستان آمد پر خوشی کا اظہار کرتے ہوئے کہا کہ وہ یہاں سیریز کھیلنے کے لیے پرجوش ہیں۔ انہوں نے ایک دلچسپ خواہش کا اظہار کرتے ہوئے مزید کہا کہ اگر انہیں دورے کے دوران موقع ملا تو وہ پاکستان کے مایہ ناز کرکٹرز بابر اعظم اور شاہین شاہ آفریدی سے ملاقات کرنا بے حد پسند کریں گی۔