پاکستان، سعودیہ کا آئل سٹوریج اپ گریڈیشن، توانائی کے شعبوں میں تعاون مضبوط بنانے پر اتفاق

پاکستان اور سعودی عرب کے درمیان توانائی کے شعبے میں دوطرفہ تعاون کو مزید مستحکم اور وسعت دینے پر مکمل اتفاق کیا گیا ہے، جس کے تحت آئل سٹوریج اور ریفائنری کی اپ گریڈیشن کے منصوبوں کو آگے بڑھایا جائے گا۔

وفاقی وزیر پٹرولیم علی پرویز ملک سے پاکستان میں سعودی عرب کے سفیر ڈاکٹر راجح بن طامی البقمی نے ایک اہم ملاقات کی، جس میں توانائی کے امور پر تفصیلی تبادلہ خیال ہوا۔ اس ملاقات کے دوران وزیر پٹرولیم علی پرویز ملک نے بتایا کہ پاکستان کی حکومت نے ’ٹیکس نیوٹرل بانڈڈ سٹوریج پالیسی‘ کی باضابطہ منظوری دے دی ہے۔

انہوں نے مزید بتایا کہ اس نئی پالیسی کے تحت سعودی کمپنیوں کو تجارتی بنیادوں پر پاکستان میں تیل کے بڑے ذخائر (آئل سٹوریجز) قائم کرنے کی پرکشش پیشکش کی گئی ہے۔ اس سلسلے میں صوبہ بلوچستان کے ساحلی و صنعتی شہر حب میں ایک بڑے پٹرولیم سٹوریج اور ریفائننگ کمپلیکس کے قیام کا منصوبہ بھی بنایا گیا ہے، جس سے دوطرفہ اقتصادی شراکت داری کو نئی مہمیز ملے گی۔ وزیر پٹرولیم کا کہنا تھا کہ ان اقدامات سے خطے میں پاکستان کے ایک اہم ترین توانائی راہداری  بننے کی صلاحیت اور اہمیت میں مزید نمایاں اضافہ ہوگا۔