ملک میں بارشوں کا نیا سسٹم داخل، لاہور، اسلام آباد اور پشاور میں بادل برس پڑے

ملک میں بارشوں کے نئے طاقتور سسٹم کے داخل ہوتے ہی لاہور، اسلام آباد، راولپنڈی اور پشاور سمیت پنجاب اور خیبرپختونخوا کے مختلف شہروں میں موسلادھار بارش کا سلسلہ شروع ہو گیا ہے، جس سے جہاں موسم خوشگوار ہوا وہیں سردی کی شدت میں بھی اضافہ ریکارڈ کیا گیا ہے۔ صوبائی دارالحکومت لاہور کے مختلف علاقوں بشمول مال روڈ، گلبرگ اور فیروزپور روڈ پر بادل برسنے سے درجہ حرارت 16 ڈگری سینٹی گریڈ تک گر گیا ہے، جبکہ محکمہ موسمیات نے دن بھر وقفے وقفے سے بارش جاری رہنے کی پیش گوئی کی ہے۔ دوسری جانب پشاور، بہاولپور، وہاڑی اور راجن پور سمیت دیگر شہروں میں تیز ہواؤں کے ساتھ ہونے والی بارش کے باعث کئی نشیبی علاقے زیر آب آ گئے اور سڑکوں پر پانی جمع ہونے سے شہریوں کو آمد و رفت میں شدید مشکلات کا سامنا کرنا پڑ رہا ہے۔ بارش کے ساتھ ہی پشاور اور دیگر علاقوں میں بجلی کی فراہمی معطل ہونے کی اطلاعات بھی موصول ہوئی ہیں، جس نے انتظامیہ کے دعوؤں کی قلعی کھول دی ہے۔