پٹرول کی قیمت برقرار، ڈیزل مزید مہنگا کردیا گیا

حکومت نے ماہِ رواں کے اختتام پر ملک میں پٹرولیم مصنوعات کی نئی قیمتوں کا باضابطہ اعلان کر دیا ہے، جس کا اطلاق فوری طور پر کر دیا گیا ہے۔

پٹرولیم ڈویژن کی جانب سے جاری کردہ نوٹیفکیشن کے مطابق ہائی اسپیڈ ڈیزل کی قیمت میں 2 روپے 29 پیسے فی لیٹر کا اضافہ کیا گیا ہے، جس کے بعد ڈیزل کی نئی قیمت بڑھ کر 402 روپے 96 پیسے فی لیٹر مقرر ہو گئی ہے۔ دوسری جانب حکومت نے عوام کو ریلیف فراہم کرتے ہوئے پٹرول کی قیمت کو گزشتہ سطح پر برقرار رکھا ہے اور پٹرول 377 روپے 91 پیسے فی لیٹر پر ہی دستیاب رہے گا۔

پٹرولیم ڈویژن کے جاری کردہ نوٹیفکیشن میں مزید بتایا گیا ہے کہ پٹرول اور ڈیزل کی یہ نئی قیمتیں آج 31 اکتوبر سے لے کر 2 نومبر تک نافذالعمل رہیں گی۔