مشرق وسطیٰ کی صورتحال، فلائٹ آپریشن بری طرح متاثر، مزید 64 پروازیں منسوخ

اسلام آباد/کراچی: مشرقِ وسطیٰ میں جاری غیر یقینی صورتحال کے سائے پاکستان کے فضائی آپریشن پر گہرے ہوتے جا رہے ہیں۔ آج اپریل کے دوسرے روز بھی پاکستان کے پانچ بین الاقوامی ایئرپورٹس سے مشرقِ وسطیٰ کے مختلف شہروں کے لیے جانے اور وہاں سے آنے والی 64 دوطرفہ پروازیں منسوخ کر دی گئیں۔

ایئرپورٹ ذرائع کے مطابق، متاثرہ ایئرلائنز میں قومی ایئرلائن پی آئی اے (PIA) سمیت ایئر بلو، ایئر عربیہ، ایران ایئر اور قطر ایئر ویز شامل ہیں۔ سب سے زیادہ متاثر ہونے والا ایئرپورٹ اسلام آباد رہا، جہاں سے 34 پروازیں منسوخ ہوئیں، جبکہ کراچی 18 منسوخ پروازوں کے ساتھ دوسرے نمبر پر رہا۔

اعداد و شمار کے مطابق، گزشتہ 33 دنوں کے دوران پاکستان سے مشرقِ وسطیٰ کے لیے مجموعی طور پر منسوخ ہونے والی پروازوں کی تعداد 2592 تک پہنچ گئی ہے، جو کہ ملکی ہوابازی کی صنعت کے لیے ایک بڑا مالی دھچکا ہے۔