پاکستان اور لتھوانیا کا سیاسی مشاورت کا آٹھویں دور کا ورچوئل منعقد، تعاون بڑھانے پر اتفاق

پاکستان اور لتھوانیا کے درمیان دوطرفہ سیاسی مشاورت کا آٹھواں دور ورچوئل (آن لائن) منعقد ہوا، جس میں دونوں ممالک نے باہمی تعلقات کا تفصیلی جائزہ لیتے ہوئے متعدد اہم شعبوں میں تعاون کو مزید وسعت دینے کے عزم کا اعادہ کیا ہے۔

دفترِ خارجہ کی ترجمان کے مطابق، اس سیاسی مشاورت میں پاکستانی وفد کی قیادت وزارتِ خارجہ کے یورپ ڈویژن کی ایڈیشنل سیکرٹری عائشہ علی نے کی، جبکہ لتھوانیا کے وفد کی سربراہی وہاں کے نائب وزیر ودمانتاس وربیکاس نے انجام دی۔ اجلاس کے دوران دونوں ممالک نے دوطرفہ تعلقات کی موجودہ سمت پر کامل اطمینان کا اظہار کرتے ہوئے تجارتی، معاشی اور ثقافتی روابط کو مستحکم بنانے پر اتفاق کیا۔

مذاکرات کے دوران عوامی سطح پر روابط اور ویزا سہولیات کو آسان بنانے کے لیے ممکنہ اقدامات پر تبادلہ خیال کیا گیا۔ اس موقع پر لتھوانیا کے وفد نے جنوبی ایشیا میں علاقائی امن، سلامتی اور استحکام کے فروغ میں پاکستان کے تعمیری اور مثبت کردار کی تعریف کی، جبکہ دونوں ممالک نے تمام عالمی فورمز پر باہمی تعاون جاری رکھنے کا عزم ظاہر کیا۔