پاکستان کو اپنی خواتین قیادت پر فخر ہے، خاتونِ اوّل آصفہ بھٹو زرداری

پاکستان کی خاتونِ اوّل آصفہ بھٹو زرداری نے خواتین کے اختیارات کے لیے ’’پرنسس سبیکہ بنت ابراہیم الخلیفہ گلوبل ایوارڈ‘‘ کی تیسری تقریب میں شرکت کی۔ تقریب قطر نیشنل کنونشن سینٹر میں اقوامِ متحدہ کے ادارہ برائے خواتین اور مملکتِ بحرین کی سپریم کونسل برائے خواتین کے اشتراک سے منعقد ہوئی۔

اپنے خطاب میں خاتونِ اوّل آصفہ بھٹو زرداری نے ایوارڈ کے وژن کو سراہتے ہوئے مادرِ ملت محترمہ فاطمہ جناح اور شہید محترمہ بینظیر بھٹو کی خدمات کا اعتراف کیا اور کہا کہ پاکستان کو اپنی خواتین قیادت پر فخر ہے۔

انہوں نے مملکتِ بحرین کی خواتین کے حقوق کے فروغ میں قائدانہ کردار کی تعریف کرتے ہوئے کہا کہ پاکستان میں لڑکیوں کی تعلیم، ہنرمندی، معاشی شمولیت اور ڈیجیٹل بااختیاری کے فروغ پر خصوصی توجہ دی جا رہی ہے۔

خاتونِ اوّل نے بحرین کی سپریم کونسل برائے خواتین کی سیکریٹری جنرل، عرب ریاستوں کے لیے اقوامِ متحدہ کی علاقائی ڈائریکٹر، اور متحدہ عرب امارات کی جنرل ویمنز یونین کی سیکریٹری جنرل سے ملاقاتیں بھی کیں۔

اس موقع پر انہوں نے مملکتِ بحرین اور اقوامِ متحدہ کی خواتین کے لیے خدمات کو سراہا اور کہا کہ پاکستان خواتین کی ترقی و بااختیاری کے لیے عالمی شراکت داروں کے ساتھ تعاون جاری رکھے گا۔