پاکستان اور فرانس میں توانائی و معدنیات کے شعبوں میں تعاون مزید بڑھانے پر اتفاق

اسلام آباد میں وفاقی وزیر پٹرولیم علی پرویز ملک سے فرانس کے سفیر نکولس گیلے نے ملاقات کی، جس میں دو طرفہ تعلقات اور بالخصوص توانائی و معدنیات کے شعبوں میں تعاون کو فروغ دینے پر تفصیلی تبادلہ خیال کیا گیا۔

ملاقات کے دوران دونوں ممالک نے توانائی کے شعبے میں تعاون مزید مضبوط بنانے پر اتفاق کیا، جبکہ فرانسیسی سفیر نے پاکستان میں پٹرولیم سپلائی کے مؤثر انتظامات کو سراہا۔

نکولس گیلے کا کہنا تھا کہ پاکستان نے دیگر جنوبی ایشیائی ممالک کے برعکس صورتحال کو بہتر انداز میں سنبھالا اور پٹرولیم مصنوعات کے حوالے سے کسی قسم کی افراتفری دیکھنے میں نہیں آئی۔

وفاقی وزیر پٹرولیم علی پرویز ملک نے اس موقع پر کہا کہ پاکستان بروقت، فعال اور مربوط فیصلوں کے باعث اس بحران سے کامیابی سے نمٹ رہا ہے۔ انہوں نے بتایا کہ وزیراعظم شہباز شریف کی قیادت میں بدلتی ہوئی سپلائی صورتحال کے پیش نظر بین الوزارتی سطح پر فوری فیصلوں کے لیے مؤثر نظام قائم کیا گیا۔

انہوں نے مزید کہا کہ اعلیٰ قیادت کی سفارتی کوششوں کے باعث متبادل ذرائع سے پٹرولیم سپلائی ممکن بنائی گئی، جبکہ حکومت نے قیمتوں کا بوجھ خود برداشت کیا اور مناسب مالی حکمت عملی کے ذریعے گردشی قرضے کو قابو میں رکھا۔

وزیر پٹرولیم کے مطابق حکومت کمزور طبقات کے لیے ہدفی سبسڈی پر بھی کام کر رہی ہے۔ دوسری جانب فرانسیسی سفیر نے کہا کہ پاکستان اور فرانس کے تعلقات مضبوط ہیں اور توانائی کے شعبے میں تعاون میں اضافہ ہوا ہے، جبکہ فرانسیسی کمپنیوں کی پاکستان کے معدنیات کے شعبے میں دلچسپی بھی بڑھی ہے۔